د اسلامي امارت د کرنې، اوبو لګولو او مالدارۍ وزیر، عطاءالله عمري په افغانستان کې د ایران اسلامي جمهوریت له سفیر، علي رضا بیکدلي سره په کتنه کې پر بېلابېلو مسایلو خبرې کړې دي.
د دغه وزارت په اېکسپاڼه لیکل شوي چې په دې کتنه کې دواړو لوریو د کرنې، مالدارۍ، سوداګرۍ او د دواړو هېوادونو د خصوصي سکتور ترمنځ د همکاریو د پراختیا پر اړتیا ټینګار کړی دی.
خبرپاڼې د ا.ا د کرنې وزیر په حواله لیکلي: “زموږ دنده خلکو ته د سالمو خوړو برابرول دي او د همکاریو اساسي موخه، په ځانګړي ډول له خصوصي سکتور سره، د سوداګریزو اړیکو پراخول او د شته توافقاتو عملي کول دي.”
بلخوا د ایران سفیر، علي رضا بیکدلي بیا ویلي چې هوکړې د پلان او ټاکلي مهالوېش له مخې تعقیب او عملي کېږي او د کرنې او مالدارۍ له لارې به له افغانستان سره قوي اړیکې ټینګې شي.
د کرنې، اوبو لګولو او مالدارۍ وزارت همداراز لیکلي چې علي رضا بیکدلي د اسلامي امارت کرنې، اوبو لګولو او مالدارۍ وزیر ته په تهران کې د اقتصادي همکاریو سازمان (ECO) په غونډه کې د ګډون بلنه ورکړې چې په یاده غونډه کېد غړو هېوادونو د کرنې وزیران ګډون کوي.


