د ا.ا کډوالو ستونزو ته د رسېدنې کمېسیون وايي چې پرون له بېلابېلو لارو ۴۲۱ نورې کډوالې کورنۍ هېواد ته راستنې شوې دي.
د دې ادارې په تازه راپور کې ویل شوي چې د نيمروز د وريښمو پله له لارې ۵۷، د هرات د اسلام کلا له لارې ۳۴، د ننګرهار د تورخم له لارې ۲۹۳ او د هلمند د بهرامچې له لارې ۳۷ کورنۍ هېواد ته راستنې شوې دي.
د کډوالو ستونزو ته د رسېدنې کمېسیون راپور څرګندوي چې ۴۱۰ کورنۍ خپلو سيمو ته لېږدول شوې او همداراز ۲۸۸ راستنو شويو ته سيمکارتونه او سلګونو کورنيو ته مرستې وېشل شوې دي.
د ویلو ده چې له تېرو نږدې څلورو کلونو راهیسې له پاکستان او ایران څخه د افغان کډوال جبري ایستل په بېسارې توګه زیات شوي دي.
بلخوا د ملګرو ملتونو تازه شمېرې ښيي چې یوازې روان لمریز کال له دوه میلیون څخه ډېر افغانان په جبري توګه افغانستان ته لېږل شوي دي.
که څه هم له ایران او پاکستان څخه د افغان کډوالو د رالېږلو پروسه له سختو نیوکو سره مخ شوې، خو د دغو هېوادونو چارواکو ټینګار کړی چې دوی به له خپلو هېوادونو ټول افغان کډوال وباسي.


