د ا.ا کډوالو چارو وزیر، مولوي عبدالکبیر د ملګرو ملتونو د پراختیایي ادارې له مرستیالې او د بحرانونو د مدیریت د برخې له مشرې، شکونودا سره په کتنه کې د کډوالو اړوند پر بېلابېلو مسایلو خبرې کړې دي.
د دغه وزارت په اېکسپاڼه لیکل شوي چې په دې کتنه کې افغان راستنو شویو ته د مرستو او په هېواد کې د کډوالۍ پر دایمي حل لارو خبرې شوې دي.
د وزارت په خبرپاڼه کې د اغلې شکونودا له قوله لیکل شوي چې د راستنو شویو ظرفیتونو او وړتیاوو ته په کتو، هغوی به د ټولنې فعال غړي شي او هغوی ته د مناسب کاري چاپېریال د چمتو کولو په برخه کې هڅې کوي.
د ملګرو ملتونو د پراختیایي ادارې پلاوي همداراز د راستنو شویو کسانو چارو ته د رسېدنې او اغېزمن کار په موخه د کډوالو چارو له وزارت سره د ګډې کمېټې وړانديز کړی دی.
په دې کتنه کې د کډوالو چارو وزیر ویلي چې د ژمي په راتګ سره د راستنو شویو ستونزې ډېرې شوې دي او په ګاونډیو هېوادونو کې د پاتې افغان کډوالو وضعیت د اندېښنې وړ دی.
نوموړي همداراز ویلي چې اسلامي امارت له کډوالو سره د لنډمهاله مرستو تر څنګ د دایمي سرپناوو پلان هم پلی کوي او په دې برخه کې یې د نړیوالو د مرستو غوښتنه کړې ده.


