له ګاونډیو هېوادونو څخه د افغان کډوالو د راستنېدو په دوام، یوازې پرون له ایران او پاکستان څخه ۱۶ زره ۲۴۳ افغان کډوال را ایستل شوي دي.
د اسلامي امارت مرستیال ویاند، حمدالله فطرت ویلي چې یوازې پرون (دوشنبې) له ایران او پاکستان څخه ۲ زره ۹۶۳ کډوالې کورنۍ راستنې شوې دي.
سرچینې لیکلي چې دا کډوالې کورنۍ د هرات د اسلامکلا، د نیمروز د ورېښمو پله، د کندهار سپینبولدک، د هلمند د بهرامچې او تورخم له لارو راستنې شوې چې له ډلې ۲۱۶۱ کورنۍ خپلو سيمو ته لېږدول شوې او له ۱۸۸۲ نورو سره مرسته شوې ده.
له تېرو څلورو کلونو راهیسې له ګاونډیو هېوادونو د افغان کډوالو راستنېدل په بېسارې توګه زیات شوي چې ډېری یې په جبري توګه راستانه شوي دي.
د راپورونو له مخې چې یوازې په تېرو شاوخوا دریو میاشتو کې له ایران څخه نږدې یو نیم میلیون کډوال راستانه شوي دي.
د دې ترڅنګ په وروستیو کې د پاکستان له بندخونو هم سلګونه بندیان ازاد او خپل هېواد ته راستانه شوي دي.
له ایران او پاکستان څخه د کډوالو جبري را ایستلو که څه هم وخت ناوخت غبرګونونه پارولي، خو د دغو هېوادونو چارواکو د ټولو افغان کډوالو پر ایستلو ټینګار کړی دی.


