د ملګرو ملتونو ویاند «سټیفان دوجاریک» هیله څرګنده کړې چې د افغانستان او پاکستان ترمنځ اوربند به دوام وکړي او ټینګار یې کړی چې د دواړو هېوادونو ترمنځ اختلافات باید له ډیپلوماټیکو لارو حل شي.
هغه په یوه مطبوعاتي کنفرانس کې وویل: “موږ هیله لرو چې اوربند به دوامدار شي او د افغانستان او پاکستان ترمنځ ټولې پاتې مسلې به د ډیپلوماسۍ له لارې حل شي.”
دا څرګندونې په داسې حال کې کیږي چې د افغانستان اسلامي امارت او پاکستان حکومت استازي د دواړو هېوادونو د پولو په اوږدو کې د څو ورځو ترینګلتیا وروسته د تېرې یکشنبې په ورځ د قطر په کوربهتوب او د قطر او ترکیې په منځګړیتوب پر اوربند هوکړه وکړه.
ویل کیږي چې د دواړو خواوو ترمنځ د خبرو اترو بل پړاو به د روان کال د اکتوبر په ۲۵مه په ترکیه کې وشي.
په ورته وخت کې د مصر د بهرنیو چارو وزارت د اسلامي امارت او پاکستان ترمنځ د اوربند هرکلی کړی.
وزارت په یوه بیان کې لیکلي چې هیله لري چې دا تړون به د دواړو هیوادونو ترمنځ د سرحدي تاوتریخوالي کمولو، د وینې توییدو مخنیوي او په سیمه کې د تلپاتې امنیت او ثبات په پیاوړتیا کې مرسته وکړي.
مصر همدارنګه د شخړو د حل لپاره د ډیپلوماټیکو حللارو او رغنده خبرو اترو پر دوام ټینګار کړی دی.
په بیان کې ویل شوي چې مصر د سولهییزو لارو چارو له لارې د سیمهییزو شخړو د حل لپاره د ټولو نوښتونو او هڅو ملاتړ کوي.


