په کابل کې اکسوس کتابپلورنځي د «شمائلې سلیمي» نوې شعري ټولګه (داغ په نسترن) خپره کړې ده.

دا کتاب په شاوخوا ۳۶۰ مخونو کې چاپ شوی. محتوا یې غزلونه او ازاد نظمونه دي، او نن چهارشنبې په کابل کې د اکسوس لخوا خپور شوی دی. 

د «داغ په نسترن» پر محتوا یو شمېر مشهورو لیکوالو لیکل کړي او د غزل په فورم کې یې د اغلې سلیمي شاعري خورا لوړه بللې ده.  

لیکوال، پروفیسور فیض محمد شهزاد لیکلي، “د شمائلې هر شعر کائیناتي حسن، فکري ژورتیا او ښکلا لري. همدا وجه ده چې پر هر زړه خپل ژور اثر پرېږدي. شعر یې د مانا او مفهوم په زیور پسوللی دی، ځکه په هر وار لوستلو سره بېل خوند لري. د شعر جدیت، نوښت او فکري جراات یې لکه خال پر جبین بریښي. د ځان له درده سره سره یې د جهان درد هم ځوروي. داسې ښکاري لکه یو باشنده چې ټول کائنات یې کور وي او  د خپل کور د هر وګړي د دردونو څړیکې په زړه کې محسوسوي. د شعر اسلوب تراکیب او تشبیهات او استعارات یې افاقي او له نوښته ډک دي، چې د اغلې پر عالمي ادب د لاسبري ښکارندویه دي.”

د دې تازه چاپ شوې شعري ټولګې په اړه د یو بل لیکوال «ډاکتر عبدالله ناشناس» د لیکنې په یوه برخه کې راغلي، “د شمائلې نظم هم د دې د غزل په شان پوخ او زړه راکښونکی دی، د نظم لمن یې هم پراخه او شتمنه ده. شمائلې چې کوم درد محسوس کړی، پر هغه یې داسې په خوږه ژبه ښکلی نظم لیکلی او لوی اعزاز یې دا چې د ژوند پر هر اړخ یې بېله څه ستونزې قلم څرخولی دی. دا نظمونه په څومره مهارت او فکري استعداد لیکل شوي، دېته په ژور نظر کتل مهم دي. ماته د ډېرو تکړه او نابغه شاعرانو رنګونه او انداز پکې ښکاري، ځکه دا برخه یې د پښتو د ډیرو ناوېیلو او جدیدو او نادره خصوصیاتو حامل ده.”

همداراز د خامه پرس خبریال، عصمت الله صالح بیا د «داغ په نسترن» کتاب شعرونه د ژبې د ناعادي کولو په زړه‌پورې هڅه بللې او د اغلې سلیمي د شاعرۍ پر تصویر یې خبرې کړې دي.

“د شمائلې سلیمي شاعري چې لولم، حیرانېږم او فکر نه کوم چې دا دې د ښځینه ذهن تولید وي، البته دا په دې مانا نه چې زه د ښځو پر تخیلي یا فکري وړتیا بې‌باوره یم، بلکې شکمن کېږم ځکه چې په ورته انداز شاعري یا د کلماتو دا ډول موزون کول په نړیواله کچه هم د سترو شاعرانو په اشعارو کې خورا په سختۍ موندل کېږي.

واخيستم د ژوند خړو سيندونو لکه رېګ
عمر مې تويېږي له لاســـونو لکه رېګ

د اغلې سلیمي په شاعرۍ کې د لوړ خیال او ژور فکر د بیان ترڅنګ د انځورګرۍ خوندور کمال ته هم متوجه کېدای شو. په شعر کې د کلمو متحرک کول هم خورا ستر ریاضت او تکلیف غواړي، خو دا د فزیکي ستړیا غوندې نه وي، بلکې هماغه د هنري اسبابو له لارې د عادي ژبې داسې ناعادي کول دي چې هره کلمه یې په چاپېریال کې د موجوده واقعیتونو رڼه عکاسي راته وکړي. یانې که خورا ساده یې ووایم، په شعر کې د یوې پدیدې د کلمې په لوستلو سره مو په ذهن کې د هماغه څیز عکس جوړ شي او دا ننداره کټ مټ لکه د یو فلم غوندې وي. 

د قاصد د آس شرنګى دى، له دې بر کنډوه هـاخوا
څوک مې ونيسئ له لاسه، حيرت وړې يم غورځېږم”

د ویلو ده چې د دې کتاب پر محتوا یو شمېر نورو لیکوالو او کره‌کتوونکو هم خپل نظرونه لیکلي دي.

بلخوا د اکسوس مسوولینو ویلي چې د شمائلې سلیمي دا تازه چاپ شوی کتاب به په راتلونکې یوه اوونۍ کې په ننګرهار، کندهار او همداراز د پېښور په یو شمېر کتابپلورنځي کې هم د مینه‌والو ترلاسونو ورسېږي.