یوناما د هرات د زلزلې د ویجاړونکو پایلو په اړه یو راپور خپور کړی او زیاته کړې یې ده چې ډېری قربانیان ښځې او ماشومان دي او بېړنیو مرستو ته اړتیا لري.

دغه سازمان د چهارشنبې په ورځ (د فبرورۍ ۲۱ مه) وویل چې د ۲۰۲۳ کال د اکټوبر د ۷مې، ۱۱مې او ۱۵مې نېټې د زلزلې له امله ۲۷۵۰۰۰ کسان اغېزمن شوي چې ۱۷۳۵۸ یې ښځې او ۱۷۱۴۶ یې ماشومان دي.

د هرات د ۶،۳ درجې زلزلې د دغه ولایت د زنده جان او انجیل ولسوالۍ تر ټولو زیاتې ځپلې دي.

راپور وایی، زلزلې د جنسیت پر بنسټ ننګونې زیاتې کړې او د ښځو په مشرۍ دندې یې تر ټولو سخت زیانمنې کړې.

په دغه راپور کې د شمېرو له مخې له ۶۰-۷۰ سلنې اغېزمنو سوداګرو ښځو څخه یوازې ۱۰ سلنه یې بیا کار پیل کړی دی.

سازمان زیاته کړه: “په ښځو باندې غیر متناسب اغیزه (د ښځو د مړینې کچه ۵۸ سلنه) د جنسیت ځواب ورکوونکي نوښتونو او د نفوس د بیلابیلو برخو لپاره مناسب ملاتړ ته اړتیا په ګوته کوي.”

ملګرو ملتونو د هرات د زلزلې د ویجاړونکو اغیزو د بیا رغولو لپاره له نړیوالې ټولنې څخه د ۴۰۲،۹ میلیونه ډالرو مرستې غوښتنه کړې ده.