طالبان وایي د کابل ښار په نننۍ چاودنه کې د یاد ډلې وسله وال لاس نه لري.

د طالبانو ویاند ذبیح الله مجاهد وایي ” دغه چاودنه  د اسلامي امارت په مجاهدینو پورې هیڅ اړه نه لري، نه زموږ مجاهدین په دې پيښه کې لاس لري اونه هم مجاهدین اجازه لري چې په بې هدفه ځای کې دا ډول درنه چاودنه ترسره کړي.”

افغان چارواکي وايي، په پلازمینې کابل کې د چاودنې له کبله د وژل شویو شمیر ۸۰ ته رسیدلې او نږدې ۳۵۰ نور ټپیان دي.

د افغانستان د عامې روغتیا وزارت ویاند وحید الله مجروح وایي، د پیښې قربانیان بېلابېلو روغتونو ته انتقال شوي امکان ولري چې په ارقامو کې بدلون راشي.

هغه زیاته کړه، چې  په مړو او ټپيانو کې ښځې او ماشومان هم شامل دي.

د کورنیو چارو وزارت د ویاند دفتر سرپرست نجیب دانش وایي، پیښه نن سهار شاوخوا ۸ نیمې بجې د لسمې امنیتي حوزې اړوند د زنبق څلور لارې ته څيرمه د موټر بم له امله رامنځ ته شوې ده.

د ښاغلي نجیب په وینا، لومړنی معلومات ښیي، دا موټر بم چاودنه د اوبو یا فاضله موادو په ټانکر سره شوې ده.