د امريکا ولسمشر «جو بایډن» وايي، پلان لري چې د دغه هېواد په راتلونکي ټاکنو کې د ولسمشرۍ لپاره ځان کانديد کړي.
بایډن پرون جمعه د تلې پر ۲۹مه (اکتوبر ۲۱) له MSNBC سره په مرکه کې ویلي چې دا پرېکړه یې رسمي نه ده، خو وايي د مبارزې اراده لري.
د امریکا راتلونکې ټاکنې به په ۲۰۲۴ کې وشي او د امریکا د دغه پړاو ټاکنو احتمالي نوماندان تر اوسه په ډاګه نه دي ویل شوي، خو د امریکا پخواني ولسمشر «ډونالډ ټرمپ» هم په ښکاره ویلي چې د ۲۰۲۴ کال ټاکنو کې به سیالي کوي.
د امریکا اوسني ولسمشر دا هم ویلي چې که په راتلونکو ټاکنو کې د کاندېدو پرېکړه رسمی اعلان کړي، قانوني دریځ به یې بدل شي.
“کله چې زه دا پریکړه وکړم، یو لړ مقررات به پلي شي، مثلاً له هغې شیبې به له ځان سره د یو نوماند په څیر چلند وکړم”
ښاغلي بایډن زیاته کړې چې سپینې ماڼۍ ته د ټرمپ د راستنیدو هڅه ممکن دئ په راتلونکو ټاکنو کې بیا کاندید کېدو ته اړ کړي.
دا په داسې حال کې ده چې له ګڼو حقوقي ننګونو سره مخ د امریکا پخوانی ولسمشر ډونالډ ټرمپ به په ۲۰۲۴ ټاکنو کې سیالي وکړي.
