افغان چارواکي وايي، د وروستیو جګړو او تاوتریخوالي له امله د هېواد په ډېرو ولایتونو کې د توکو بیې لوړې شوې او دا حالت یې د اندېښنې وړ بللی دی. 

د افغانستان د سوداګرۍ خونې ویلي، چې که په هېواد کې روان تاوتریخوالي همداسې دوام وکړي، نو په بازارونو کې به د توکو بیې لا لوړې شي.

د دې خونې یو مسوول رسنیو ته ویلي، چې وروستیو جګړو پر مارکېټونو او سوداګرۍ منفي اغېز کړی او په خبره یې که روان وضعیت همداسې دوام وکړي، نو هېواد به له یوه خطرناک حالت سره مخ شي.

دا په داسې حال کې ده، چې د وروستیو جګړو له امله د یوه ډالر بیه تر ۸۱ لوړه شوې ده، چې افغان چارواکو دا حالت یو بېساری تحول بللی دی. 

بلخوا د سوداګرۍ خونو د مدیره پلاوي غړي «خان جان الکوزي» د وسله‌والو طالبانو تر ولکې لاندې د ځینو بندرونو راتلل د اندېښنې وړ وبلل او په خبره یې چې د هېواد ډېر سوداګر یې له خطر سره مخ کړي دي.