متحده عربي اماراتو د لومړي ځل لپاره په برياليتوب سره مريخ ته خپل پلټونکې فضايي بېړۍ ولېږله.

دې بېړۍ ته د (هيله) نوم ورکړل شوی او د جاپان له تانګاشيما ټاپو وتوغول شوه.

ټاکل شوې دغه بېړۍ ۵۰۰ مېليون کيلومتره مزل وکړي او راتلونکی کال مريخ ته ورسېږي.

په متحده عربي اماراتو کې د دې پروژې مشره سارا اميري وايي، دا به د دې هېواد ماشومانو ته يو نوی او ښه احساس ورکړي.

د متحده عربي اماراتو انجنيرانو د دې بېړۍ په جوړولو او توغولو کې له امريکايي پوهنتونونو مرسته ترلاسه کړې وه او ټاکل شوې د مريخ د اتموسفير او هلته د ژوند د اسانتیاوو په تړاو پلټنې وکړي او معلومات يې ځمکې ته را واستوي.