کورنیو چارو وزارت وايي، تیرکال یې هېواد کې د نشه يي توکو ۲۳ لوی قاچاق وړونکي او یو شمېر نور پلورونکي نیولي دي.

د کورنیو چارو وزارت سرپرست وزیر مسعود اندرابي نن جمعه د (چنګاښ میاشتې ۶) له نشه يي توکو سره د مبارزې اونۍ په مناسبت ويډویويي پیغام کې ویلي چې تېرکال یې د نشه یي توکو ۲۳ لوی کاروباریان نیولي دي.

هغه د دې لاسته راوړنې ترڅنګ ویلي چې افغانستان لاهم د نړۍ په کچه پر نشه یي توکو لړلی هېواد بلل کېږي او دا مهال ۳ میلیون افغانان په نشه يي توکو روږدي دي.

ښاغلي اندرابي پر نشه يي توکو د یاد لوړ شمېر افغانانو اخته کېدل، افغانستان ته یو لوی ناورین یاد کړی دی.

هغه همداراز ویلي چې ملي پولیس له نشه يي توکو سره د مبارزې برخه کې جدي دۍ، او په وینا یې تیرکال یې د نشه يي توکو ۲۳ لوی قاچاق وړونکي او په لسګونه نور کاروباریان نیولي دي.