تېرو څلریشت ساعتونو کې د هېواد په کچه د کرونا ویروس ۴۶۰ نورې مثبتې پېښې ثبت شوې دي.

عامې روغتیا وزارت نن پنجشنبې د (چنګاښ میاشتې ۵) ویلي چې له پرون راهیسې ۴۶۰ نور کسان هم په کرونا ویروس اخته شوي، چې له دې سره هېواد کې په یاد ویروس د اخته کسان شمېر ۳۰ زره او ۱۷۵ تنو ته ورسېد.

تېرو څلریشت ساعتونو کې د کرونا ویروس له امله یو شمېر کورنۍ د غم په ټغر ناستې دي او دې موده کې ۳۶ کسان چې په کرونا اخته وو، مړه شوي دي.

د مړو شویو کسانو تازه شمېر سره هېواد کې د یاد ویروس له امله د قربانیانو شمېر هم ۶۷۵ ته ورسېد.

د عامې روغتیا وزارت د معلوماتو له مخې په تېرو څلریشت ساعتونو کې ۳۰۵ کسان له کرونا ویروس څخه روغ شوي او خپلو کورنیو سره یو ځای شوي دي، چې له دې سره هېواد کې د روغ شویو کسانو شمېر هم ۱۰ زره او ۱۷۴ ته ورسېد.