په پلازمېنه کابل ښار کې پر یوه پوځي مرکز ځانمرګي برید شوی، چې له امله یې ۱۰ کسان وژل شوي او ۲۹ نور یې ټپیان شوي دي.

امنیتي سرچینې د پیښې پخلی کوي او زیاتوي چې د نهمې امنیتي حوزې اړوند دکابل ګمرک په سړک کې چاودنه شوې ده.

د کورنیو چارو وزارت ویاند نجیب دانش تائیدوي، چې د G4S په نوم پر یوه مرکز برید شوی، چې په پایله کې یې ۱۰ کسان وژل شوي او ۲۹ نور ټپیان دي.

د کابل ښار د نهمې امنیتې حوزې امر بسم الله تابان له دې وړاندې ویلي و، چې د یوې خصوصي امنیتي شرکت مرکز ته څېرمه موټر بم برید شوی دی.

د عامې روغتیا وزارت چارواکو هم له دې وړاندې ویلي و ، چې د پیښې له ځایه روغتونونو ته ۱۱ ټپیان ور وړل شوي دي.

تر اوسه کوم چا یا ډله د برید مسئولیت په غاړه نه دی اخیستی.